SI TATAY ANG LUBI KAG ANG KILAT

Hello mga Palangga ko!

Desyembre nga bulan kag tyempo sang tig tulugnaw kag bagyo. Kon naga ulan naga upod man ang pag panaguob kag pag pangilat. Madumduman ko sang gamay ako nga kon mag panaguob na gani naga panago ako sa sulod sang kwarto nga naga panimuron sang habol kag gina pugngan ko sang akon kamot ang akon duwa ka dulunggan. Si Nanay namon ang radyo gina patay kag ang hispeyo gina tabunan sang tuwalya. Kag ang tanan nga bintana sirado mabatian ko gid nga sako ang panaguob kag kilat. Kag may ara gani sang naga kaigo mga karabao gid permi kag ang masubo pa kon ang isa tawo hayz kon mabatian naton sa mga balita.

Mga alas 6:30 sang gab.i samtang kami naga panyapon gulpi lang napatay ang amon nga suga uso pa ato ang kingki kag petromax kon sin.o sa inyo naka abot so ma dumduman ninyo ang akon buot nga silingon kay wala pa sa amon sang elektrisidad gani nga amo sini ang amon nagamit sa sulod sang balay si Nanay gina handa na niya ang posporo kag suga kada antes kami mag tulog kay ako indi gusto nga ipatyon ang suga kon mag tulog kay daw indi ako kaginhawa kon wala sang suga.

Amo na ini ang akon nadakuan nga kada mag tulog may suga gid. Samtang naga panyapon kami si Tatay namon nag panaog guwa sa balay kay nabatian namon nga ang amon baboy nga edik naga iwik sa likod balay gani si Tatay nag dali.dali siya kag ginhingagaw kag samtang ara siya sa dalum sa likod sang balay gulpi lang nag pangilat kag may nabatian kami nga daw nag huganas sa sulod balay sa amon nga kilid dingding hasta sa amon atubangan ang kalayo nga naga tumbo.tumbo grabe ang amon nga nerbyos maayo lang gid kay wala sang may naigo sa amon. Hasta na si Tatay nag sulod nga masinulub.on kay nakita gid niya kon paano naigo ang amon baboy kag wala gid naka luwas. Kag naga pasalamat kami sa mahal nga Diyos nga si Tatay wala man siya naigo sang kilat.

Pag kaaga nakita na namon ang amon lubi nga tanum sa likod sang balay kalain gid sang iya nga hitsura. Ang mga paklang kag ang mga panit nag kalakuha gid. Daw parihas nga gin utod ang punta sang lubi. Kasubo batyagon sang natabo sa amon nga baboy kag lubi pero naga pasalamat gid kami nga ang lubi ang naka salbar sa amon kay kon wala ang lubi siguro ang balay namon sunog na kag basi kami nadalahig ukon naigo man. 

Gani samtang naga lakat ako pauli sa balay naagyan ko ini ang matahum nga puno sang lubi kag nadumduman ko dayon ang natabo sa amon samtang naga bagyo pangilat. Nga ang ini nga tanum may naga pabilin gid nga maayo nga istorya sa amon nga pamilya. Kag ang ini nga tanum damo gid sang mga benipisyo nga mahatag sa aton nga kabuhi halin sa puno hasta sa punta.

Okey mga palangga ko enjoy reading ...